Hilabete hasieran hasi ziren, Tolosako Lizardi kultur elkarteak antolatutako Nafar Estatua Gogoan egitasmoko jarduerak. Osteguneroko hitzaldiez gain, beste hainbat irteera eta txango ere antolatu dituzte, eta egitaraua amaierara iristen ari dela, pasa den asteburuan bi mendi irteera egin zituzten. Larunbatean, 10:00etan Mendikuteko gaztelua aitzakia hartuta, Gipuzkoako nahiz Nafarroako hainbat gazteluri buruzko hitzaldia eskaini zuen Juantxo Agirre Mauleonek, Urkizu auzoko Alur txiki elkartean. Antxon Bandresen omenaldia ere egin zuten, eta hura gogora ekartzeko panela jarri dute Urkizuko elkartean; handik, Mendikutera ibilaldia egin zuten. Igandean, berriz, egun osorako txangoa antolatu zuten. Goizean, kafearekin batera, Juantxo Agirre Mauleon arkeologoak proiekzioa eskaini zuen Amaiurko Gaztelua elkartean, jarraian bisitaldiarekin jarraitzeko. Ibilaldia amaitu eta gero, talo dastatzea izan zuten joan ziren 30 lagunek, eta azkenik, bazkariarekin borobildu zuten eguna.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!