Tolosako Udaberri Dantza Taldeak Miarritzen ospatu ohi den Maitaldia jaialdian hartuko du parte. Guztira 150 euskal dantzari inguru bilduko dira jaialdian, eta tolosarrez gain Maritzuli Konpainia, Leinua Dantza Taldea, Duguna Iruñeko Dantzariak eta Irrissariko kabalkadak hartuko dute parte. Elkartzearen amaieran dantzariak, musikariak eta publikoa bilduko dira mutxiko eta jauzien inguruan. Udaberrikoak irailaren 12an, datorren larunbatean, ariko dira bertan, 16:30ean Mazon parkean.
Udaberrik bertan parte hartzeko gonbita ilusioz eta konpromisoz hartu duela esan du, eta nabarmendu du ekitaldian parte hartuko duten beste taldeak erreferenteak direla euskal folklore eta tradiziozko dantzetan, horregatik, ilusio bereziarekin plazaratuko dute Tolosako bordon dantza.
Malandain Ballet Biarritz da jaialdiaren eragile nagusia, eta Thierry Malandain da programazioaren arduradun artistikoa. Udaberritarrek «historikotzat» jo dute erakunde horrekin elkarlanean aritzeko aukera.