Atzo, gomazko paleta modalitateko Gipuzkoako Herriarteko Pilota Txapelketako finala jokatu zuten Tolosak eta Azkoitiak Donostiako Atano III pilotalekuan. 2019ko finala errepikatu zuten Tolosak eta Azkoitiak. Orduan, azkoitiarrek irabazi zuten, baina tolosarrek errebantxa nahi zuten. Azkenean, ordea, orduko zapore gazi-gozo berarekin geratu ziren, eta txapelik gabe itzuli ziren etxera, bezperan adunarrei gertatu moduan.
Lehenik, Tolosako Jon Aldazabal eta Azkoitiko Iker Epelde aritu ziren kantxa osoan. Erraz irabazi zuen azkoitiarrak: 20-3. Binakako neurketan, finala berdindu zuen Tolosak. Karim Laamirnik eta Julen Izagirrek 20-14 hartu zituzten mendean Azpiroz eta Larrañaga. Azken partidan erabakiko zen garailea. Odei Arregi tolosarrak eta Jokin Aizpuru azkoitiarrak zazpiaren barruan jokatu zuten, eta Aizpuruk lortu zuen garaipena: 20-13. Iñaki Arriolak, Urtzi Erleagak, Unai Etxeberriak eta Gexan Mendizabalek ere jokatu dute Tolosarekin aurtengo txapelketan.