Finalerdiak etxean hasi zituzten Tolosako palistek joan den asteburuan. 2-1eko emaitza lortu zuten orduan. Andoainen, gaur, etxekoek lehen partidan aldaketa bat sartu dute, kanporaketa irauli nahi zutela agerian utziz. Taldeko izarra den Loidiren ordez Belaunzaran jarri dute Mendizabalen aurka. Ez zaie nahi bezala atera jokaldia eta tolosarrak 20-14 garaitu du. Horrek kanporaketa ia-ia erabakita utzi du, eta bigarren partidan, binakakoan, bikote berri bati aukera ematea erabaki dute etxekoek. Tolosarrek euren bikotearekin jarraitu dute eta 20-6ko emaitzarekin irabazi dute Izagirrek eta Laarmirnik. Azken partidan ez zegoen ezer jokoan, eta Arregiri atseden eman diote. Taldeko izarraren ordez Aldazabalek jokatu du, eta galtzaile suertatu da, Andoaingo Agirreren aurka: 20-14. Esan behar da partida hori Loidik ere ez duela jokatu.
Finalari begira gogotsu azaldu dira tolosarrak: «Azkoitia izango dugu aurrean, Aia kalean utzi baitzuen atzo. Esperantzarekin gaude, baina badakigu ez dela erraza izango. Saiatuko gara eta ea txapela etxera ekartzen dugun».