Arrakastaz abiatu dute aurtengo Bedaioko Mendi Martxa. Artubi kultur elkarteak hemeretzigarrenez antolatu du, eta dagoeneko martxan dira mendizaleak. Goizean goiz pilotalekutik irten dira eta, ohi moduan, bi ibilbide izan dira aukeran; 25 kilometroko ibilbide luzea eta 18 kilometroko martxa motza. Aurtengo edizioan, guztira, 135 lagunek eman dute izena; 60 ibilbide luzean eta 75 ibilbide motzean.
Mendizaleak Bedaioko inguruko mendietan ibiliko dira, eta bidean zehar hainbat anoa gune izango dituzte. Pilotalekuan izango du amaiera ibilbideak, eta bertan hamaiketakoa egingo dute. Eguerdian, berriz, antolatzaileek bazkaria egingo dute.