Tolosako Udalak azaldu duenez, herritar bati «indarkeriaz» eraso egin diote, eta «irain homofoboak jasan» ditu. Gertakariak aste honetan, astelehenean, gertatu ziren, eta udalak biktimari «babesa eta elkartasun osoa» helaraztearekin batera, esan du «errotik» gaitzesten duela gorroto, diskriminazio edo indarkeria adierazpen oro, «izan sexu-orientazioagatik zein genero-identitate edo adierazpenagatik». Udalak esan du etengabe dagoela biktimarekin harremanetan, eta hark eskatu diola gertakariaren testigantzak biltzeko. Horregatik, erasoa ikusi zuten herritarrei udalarekin harremanetan jartzeko dei egin die, informazioa osatzeko.
Bada, udalak zehaztu duenez, erasoa astelehenean, 13:15-13:20 inguruan gertatu zen, Sagrado Corazon eraikina eta San Frantzisko kaleko 39 zenbakiaren artean. Biktima —42 urtekoa— bere amarekin zihoan, eta erasotzailea, berriz,—20 urte ingurukoa— lagun batekin zihoan, patinete elektrikoan. Udalak esan du erasoaren unean jende gehiago bazegoela inguru horretan, beraz, harremanetan jartzeko eskatu du, gertatutakoaren berri eman dezaten.