Tolosako Udalak adierazi duenez, astelehenean, «indarkeriaz» eraso egin zioten herritar bati, eta «irain homofoboak jasan» zituen. Horrelako erasoek pertsonen askatasuna eta oinarrizko eskubideak urratzen dituzte, eta ez dute lekurik errespetuan, aniztasunean eta bizikidetzan oinarritzen den gizarte batean», gaineratu du.
Erasoa jasan duen herritarrari eta haren ingurukoei «babesa eta elkartasun osoa» helarazi dizkio udalak. Era berean, berriz adierazi nahi izan du «errotik» gaitzesten duela gorroto, diskriminazio edo indarkeria adierazpen oro, «izan sexu-orientazioagatik zein genero-identitate edo adierazpenagatik». Halaber, erasoa ikusi zuten herritarrei udalarekin harremanetan jartzeko dei egin die, «gertatutakoari buruzko informazioa osatzeko».
Udalak esan du lanean jarraituko duela Tolosa «herri aske eta segurua» izan dadin, «pertsona guztiek, beldurrik gabe, bere sexu-orientazioa eta identitatea askatasunez eta duintasunez bizitzeko aukera izan dezaten. Elkartasunarekin, erantzukizun kolektiboarekin eta errespetuarekin erantzungo diogu gorrotoari».