Futbol 00 Tolosa egitasmo berria aurkeztu dute goizean Tolosako udaletxean, eta bertan izan dira Andu Martinez de Rituerto Tolosako alkatea eta Gorka Etxeberria Futbol 00 entrenatzailea. Kirolak «balore positiboak» sustatzen dituen eskola izan behar duela adierazi du alkateak, baina horretarako landu egin behar dela eta kontziente izan behar dela gaineratu du: «Ni beti aldarrikatu izan naiz balore positiboak sustatuko dituen kirolaren alde eta balore positibo horien artean dago elkarlana, arauen errespetua eta lehia. Batzuentzat lehia ez da zerbait positiboa eta lehia positiboa izango da, baldin eta irakurketa egokia egin eta ondo bideratzen bada, eta batez ere gazteei apaltasunez irabazten eta duintasunez galtzen erakutsi behar diegu».
Hain justu, Futbol 00 egitasmoak «gizarte mugimendu masibo bat» bilatzen du, futbolaren barrutik eta ingurutik portaera etiko eta osasungarri eraginkor bat sustatzeko, eta helduei tresna eta trebetasun egokiak emateko adingabeen kirol-jardueran zeregin eta laguntza egokia izan daitezen. Era berean, kirol mundu osorako erreferentziazko programa bat izatea nahi da, gai izango dena pertsonak mobilizatzeko eta portaerak eraldatzeko prozesuak antolatzeko, eta aitortua izango dena kalitateagatik, eraginkortasunagatik eta etikagatik.
Egitasmoa berritzailea dela eta orain arte ez dela antzekorik egin jakinarazi du Etxeberriak: «Lehen arrazoia behetik gora datorrelako izan da, hau da, benetan egunero lanean ari direnekin –entrenatzaileekin eta gurasoekin– lan egitera gatozelako; bigarren arrazoia, metodologiak pedagogia positiboa sustatzen duelako; eta azken puntua da Futbol 00 nahidunarentzat delako, ez du gaizki aritzen direnei portaerak aldatzeko balio, baizik eta ados daudenak bildu, indarra hartu eta testuinguruak aldatzeko balioko du».
Horretarako, hiru alorretan egingo dute lana: «Lehena, adin txikien arteko harremanekin, indibidualistagoak direnekin edo talde sentsazioa dutenekin; bigarren alorra lehiakortasunarena da, edonork ulertu dezakeelako lehiakortasun toxikoa txarra dela, baina gure ustetan, ez lehiakortasuna agian epe motzean funtzionatu dezake, baina epe luzean ez. Horregatik, gure ustetan lehiakortasuna eta anbizioa modu positiboan ulertuta herria, taldea edo norberaren hazkunderako ezinbesteko baliabidea izan daiteke. Eta hirugarren alorra gurasoen akonpainamendua edo zainketa da, askotan gurasoak baitira presioa sartzen dutenak edo testuinguru guztia zakartzen dutenak».
Helburu horiekin abiatu dute Futbol 00 Tolosa egitasmoa, eta horren inguruan arituko dira ekainaren 3an, 19:00etan, Tolosako Topic-en eskainiko duten hitzaldian, Talde-lanaren, lehiakortasunaren eta anbizioaren onurak gazteen heziketak izenburupean. Zuriñe Iglesias kazetariak gidatuko du solasaldia eta Etxeberria Martinez de Rituertorekin batera izango dira Ainhoa Artolazabal ikastolako zuzendaria eta txirrindulari ohia eta Jagoba Arrasate Euskal Selekzioaren entrenatzailea; azken hori online moduan parte hartuko du. Hitzaldia kirol guztietako entrenatzaile, kirolari eta herritar orori dago zuzenduta, eta bertara joateko gonbita zabaldu dute.
Alkatearen ustetan udaletik sustatu nahi duten kirol ereduarekin bat datorren egitasmoa da, eta «futbolak ere behar du horrelako ekimen bat etikoagoa eta hezitzaileagoa bultzatzeko». Kasu honetan, Futbol 00 Tolosa egoitza izango da, baina dagoeneko Tolosa 00 kontzeptua ere jorratzen hasiak direla jakinarazi du Etxeberriak, beste kirolei eta herritarrei ere irekia egongo den egitasmoa izango delako.
Futbol 00 mugimendu sozial independentea da, eta mota guztietako pertsona eta erakundeen topagunea. Proiektua irabazi-asmorik gabeko elkarte baten bitartez artikulatuta dago, eta erakundeekin lankidetza publiko-pribatuan lan egingo du, batez ere Kirol Gaztea Fundazioarekin eta Kirol Kontseilu Gorenekin.