Ezker abertzaleko gazte antolakundeak, Ernaik, laugarren kongresua amaitu berri du Bergaran. Maiatzaren 9an ospatu zuten urte osoan zehar prestatzen egon diren ekitaldia, eta bertan 800 lagun inguru baino gehiago bildu ziren. Kongresuan, prozesuaren nondik norakoak azaldu eta hipotesi estrategikoa aurkeztu zuten. Amaiur Egurrola Ernaiko bozeramaileak ere hitza hartu zuen.
Egungo testuinguruan, Ernaik gazte ororentzat tresna eta helduleku izan nahi duela adierazi dute. Horretarako, euren esanetan, «antolakunde zabal eta indartsua beharrezkoa da, ildo politiko definituarekin eta gazte independentistak askapen prozesura batzeko balioko dutenak».
Era berean, antolakundearen bi konpromiso nagusiak berretsi dituzte; hain zuzen, Gazteriarekikoa eta Euskal Herriarekikoa. Hala, antolakundetik nabarmendu dute «ez dutela etsiko, Euskal Herria askatasunera eraman eta gazteria duintasunez bizi arte». Horretarako, antolakundea indartu beharra dagoela azpimarratu dute egungo erronkei erantzuteko gaitasuna izango duen egitura eraikiz.
Azkenik, argi utzi dute garaiak borroka eskatzen duela eta Euskal Herria aske, sozialista, feminista eta euskaldunaren alde lanean jarraituko dutela.