Eskaintza fanzoneak izango dituzten herrietan egingo dute, hau da, Tolosan, Lasarte-Orian, Zarautzen, Zumarragan eta Hondarribian. Horiek horrela, larunbatean Combo Guazen Reala ekimena izango dute Tolosako hainbat tabernatan. Horri esker ogitarteko eta edari konbinazioa eskainiko dute prezio murriztuan, eta helburua da «ostalaritza sektorea lurraldean izango den jai giroan inplikatzea». Tolosan, Amets, Baserri, Iurre, La Toskana, Melemele, Ikatza, Eguzki, eta Bide Goxo tabernetan izango dute eskaintza.
Mikel Ubarretxena Gipuzkoako Ostalaritza Elkarteko lehendakariak esan du elkarteak oso positiboki baloratzen duela ekimena: «Sektoreari aukera ematen dio lurraldearentzat hain berezia den egun batean aktiboki parte hartzeko. Realaren finala aukera paregabea da giroa sortzeko, gure udalerriak dinamizatzeko eta ostalaritzak herritarren topagune gisa duen papera indartzeko».