Herri zaintzaile bihurtzeko prozesuan beste aurrerapauso bat eman du Tolosak. Iaz Tolosako Zaintza Ekosistemaren Diagnostikoa aurkeztu zuten, eta egindako lanketaren ondorioetatik abiatuta, orain, Tolosako I. Zaintza Plana sortzea da helburua, baita zaintzaren arloan lan egiten duten eragileekin koordinazio egitura bat sortzea ere.
Udalak adierazi du ikuspegi parte-hartzailearekin izango duela prozesuak; horretarako, zaintzaren ekosistema osatzen duten eragileak batu nahi dituzte. «Tolosak komunitate indartsua du kohesio soziala eta elkartasuna sustatzen duten eragile askorekin, zaintza kezka iturri dutenak. Hala ere, gaur egungo gizarte aldaketa sakonek eta zaintza esparruan antzematen diren jardun desegokiek gizarte eragile publiko, komunitario eta ekonomikoen arteko estrategia bateratua eskatzen dute», azaldu du udalak.
Saretze hori landu eta aurrera begira oinarri bat sortzeko, Zaintza Diagnostikoak hiru esparru zehazten ditu, eta bakoitzeko bina saio antolatu dituzte, elkar entzuteko eta hausnarketa partekatzeko. Honakoak dira saioak:
- Adinekoen eta desgaitasuna duten pertsonen zaintza
- Apirilak 13, astelehena. 10:00-12:00. Gazte Topagunea (kultur etxea).
- Haur eta nerabeen zaintza
- Martxoak 2, astelehena. 17:00-19:00. Gazte Topagunea (kultur etxea).
- Apirilak 20, astelehena. 17:00-19:00. Kultur etxeko areto nagusia.
- Zaintzaileen zaintza
- Martxoak 9, astelehena. 17:00-19:00. Gazte Topagunea (kultur etxea).
- Apirilak 27, astelehena. 17:00-19:00. Gazte Topagunea (kultur etxea).
*Saio guztiak euskaraz izango dira, baina guztietan izango da gaztelaniara itzultzeko zerbitzua.
Zaintzaren alorreko profesional, elkarte, boluntario eta erakundeez gain, interesa duten norbanako orok parte hartu dezake saioetan. Izena emateko hiru bide daude: galdetegi hau bete, gobernantza@tolosa.eus helbidera idatzi edo 943 654 466 telefonora deitu (121 luzapena).