Goizean goiz, 06:00ak aldera, piztu dituzte Trianguloa plazako su txikiak ekoizleen sariketara aurkeztutako babarrunak kozinatzen hasteko. Profesionalak aritu dira lan horietan, eta ordu luzez, su baxuan kazoletan bor-bor izan eta gero, epaimahaiaren lana hasiko zen, eguerdi aldera.
Herritarrek babarrunak hamaiketako gisara dastatu dituzte; izan ere, Babarrunaren Kofradiako kideek herritarren artean banatu baitituzte. Babarrunek lagundu diete bertaratutakoei beroan sartzen. Horrelaxe baieztatu baitu ontzi txiki bakoitzetik ateratzen zen kea, giroko hotzarekin kontrastean.
Trianguloa plazaz gainera, San Frantzisko pasealekuan ere aritu dira sukaldean emakume-gizonak. Zehazki, 24 bikote kozinatu dute nor baino nor, Tolosako babarrunak hoberen nork prestatzeko lehian. Bi guneak girotzen, bai Trianguloa eta baita San Frantzisko ere, Tolosako bi ahots ezagun: Julen Telleria eta Joseba Usabiaga.
Gutxika-gutxika betetzen hasi dira kaleak gaurkoan. Izan ere, lehen orduko hotzak seguruenik atzeratu du askoren irteera. Hala ere, azkenik jende masa antzeman da Tolosako buruhandi eta erraldoiek kaleak bete dituztenean. Eurekin batera prozesioan atzetik, haur eta gaztetxoak zein euren gurasoak.
Musikak protagonismoa
Xexili Egunak bete-betean harrapatu du Babarrunaren Festak. Bada, Tolosako Musika Bandak Alde Zaharreko kaleak musikaz blaitzeko probestu du eguna. Kalejiran ibili dira Tolosako musikariak festa girotzen. Buruhandi eta erraldoiekin batera pieza bat jo dute Plaza Zaharrean jendez inguratuta.
Gizarte-onura
Tolosako kaleak jendez beteko zirela jakinda, Minbiziaren Aurkako Elkarteak mahaiak sakabanatuta izan ditu goiz guztian, eta paseatzaileei diru-ekarpena egiteko eskatu diete.
Edonola ere, berriro ere Tolosa bere festa preziatuenetariko bat ospatzen ari da –aurtengoan atzerapenik gabe–: Tolosako Babarrunaren Festa.