2002ko azaroan, Tolosako San Esteban auzoan, babarruna aletu, bereizi, izoztu, ontziratu, etiketatu eta merkaturatzeko pabiloia inauguratu zuten. Bertatik ateratzen dira hain ezagun egin diren babarrun zakutxoak.
Elkartearen helburu nagusiak dira bertako babarruna defendatzea, ezagutaraztea eta bereiztea erruz sartzen den kanpoko babarrunari aurre egiteko. Azken finean, kontsumitzaileari jatorriaren eta kalitatearen ziurtagiria duen produktua eskaini nahi diote, eta, nekazariari, berriz, ordain egokia eta duina eman. Elkarteak labore honen ikerketa eta garapena sustatu eta bultzatu nahi ditu. Lan-prozesuetan ezarritako sistema eragileen bidez produktuaren ibilbidea eta kalitatea kontrolatu, eta elkarren arteko merkataritza bereizia egiten du, irudi korporatiboaren erabilera zentralizatuz, eta kontsumitzaileen konfiantza hobetzeko helburuarekin.
Nola prestatu babarrunak?
Babarrun kilo bat erabili, 8 edo 10 pertsonarentzat. Jarri babarrunak lapikoan urez ondo estalita su bizian. Irakiten hasten denean, bota 8 edo 10 koilarakada oliba-olio. Utzi 10 minutu gehiago irakiten eta ondoren jaitsi suaren indarra, irakin alai batekin utzita. Gehitu ur beroa (txorrotekoa) beharrezkoa denean. 2 ordu eta erdi edo 3 ordutik aurrera, joan sua doitzen irakin baxu bat mantentzeko, eta, nahi izanez gero, babarrunak beste ordu batez sutan eduki. Bukaeran, bota gatza, utzi 10 minutu, eta jaitsi sua edo itzali.
- Telefono zenbakia. 943 65 02 53
- Helbidea. San Esteban auzoa 29, A / Laskorain Goikoa Industrialdea (Tolosa)