Tolosako Udalak bilera antolatu du Larramendi auzoan, Arrameleko San Joan ermitan. Datorren asteartean izango da, uztailak 15, 19:30ean hasita. Udalak auzoko bizilagunei dei egin die saioan parte hartzera, irekia izango baita.
Larramendi Auzo Elkarteak gutun bat argitaratu du, aste honetan, sare sozialetan. Udalarekin haserre daudela adierazi dute; azken urteetan auzoarekiko «utzikeria eta interes falta» izaten ari dela salatu dute, eta esan dute, protesta moduan, zenbait ekitaldi ez burutzea erabaki dutela.
Gutun berean, arazoari «berehalako erantzuna eta behin betiko konponbidea ematea» eskatzen zuen elkarteak. Horretarako, alkatearekin eta eskumena duten zinegotziekin «premiazko bilera bat» egitea eskatzen zuten, «egoerari heldu eta, ahalik eta azkarren, irtenbide bideragarri bat aurkitzeko». Bada, datorren asteartean izango dute horretarako aukera, San Joan ermitan.