Zortzigarren egin zuen barra paraleloetan eta 13. eraztunetan, Base 4 kategorian. Emaitza nabarmena da oraindik infantil mailan urtebete falta zaion eta gimnastikan oso gutxi entrenatu duen 13 urteko gaztetxo batentzat.
Echartek gaur egun Iruñean entrenatzen du, Tolosatik ordubetera, Backflip Navarran, eta Nafarroan dago federatuta, Gipuzkoan ez dagoelako azpiegiturarik. Bi entrenatzaile «oso onekin» entrenatzeko zortea du bertan, Kike eta Javier Gomez, mundu mailan lehiatutakoak. Orain gutxi gimnastika artistikoko eskola bat sortu dute, eta emaitza oso onak lortu dituzte: Espainiako Txapelketan lau ikasle lehiatu dira, eta bi urrezko domina lortu dituzte jauzian, eta hirugarren postua barra finkoan. «Adur talde handi horretan dago, eta oso dedikazio handiarekin eta talde izpirituarekin entrenatzen dute», azaldu du bere aita Pablo Echartek.
Betidanik akrobaziak egiteko eta edozein lekutan eskalatzeko joera handia izan duela gaineratu du bere aitak. «Pandemian itzulipurdiak eta akrobaziak egiten ikasi zuen, eta parkour egiten ikasi zuen bideoen bitartez. 2023an zortzigarren geratu zen Espainiako Txapelketan», zehaztu du. «2024an berriro akrobaziak entrenatzen hasi zen astean behin Backflip Navarran, eta lehiatzeko grinak kirolez aldatzera eraman zuen eta gimnastika artistikoan hasi zen erabat. Parkourra kirol moduan oso modalitate gaztea da, txapelketa gutxirekin, eta horregatik erabaki zuen aldatzea». Orain lortu berri dituen emaitzek hauspoa eman diote Echarti. «Iruñera joateko ordubeteko bideaz ahazteko modua ematen digu, eta datorren denboraldiari ilusioz aurre egiteko», esan du bere aitak.