Izaskun Zeberiok bere mediku ibilbidean izan duen «bikaintasun klinikoa» saritu nahi izan du Onda Cero irrati kateak, Donostiako Aquariumen antolatutako I. Gipuzkoako Emakumearen Saria ekitaldian. «Aurrera eraman duen ikerketa berritzailea pazienteekiko konpromiso sakonarekin uztartu ditu», esan dute antolatzaileek aitortza egiterako garaian.
Nafarroako Unibertsitatean Medikuntza eta Kirurgian lizentziaduna da Zeberio, hematologian eta hemoterapian osatu zuen bere egoitza Iruñeko Virgen del Camino Ospitalean, eta bertan sendotu zuen espezialitateko prestakuntza. 2011 eta 2013 artean, bi urteko egonaldia egin zuen ikertzaile kliniko gisa New Yorkeko Memorial Sloan Kettering Cancer Centerren, mundu mailan onkologia zentro ospetsuenetako batean.
2014az geroztik, Osakidetzako Donostia Unibertsitate Ospitaleko (HUD) Hematologia eta Hemoterapia Saileko kide da, eta funtsezko egitekoa du linfomen unitatean eta terapia aurreratuen ezarpenean. Duela gutxi, Hematologia Departamentuko buru kliniko izendatu dute.
«Enpatia, gaixotasun konplexuen xehetasunak modu argi eta sentikorrean azaltzeko gaitasuna eta pazienteei eskaintzen dien dedikazioa dira aparteko profesional bihurtzen duten ezaugarriak. Bere pazienteek haren hurbiltasuna eta konfiantza sortzeko gaitasuna nabarmendu izan dute, eta, hain zuzen, alderdi horiek osatzen dute bikaintasun teknikoa», esan dute sari banaketa ekitaldian Onda Cero irrati kateko arduradunek.