Tolosa&Co merkatarien elkarteak sekulako festa egin du, arratsaldean, Trianguloa plazan: udaberri-uda denboraldiko fashion show-a. Elkarteko kide diren 32 dendak, datozen hilabeteetarako jantzi eta osagarri aproposak aurkeztu dizkiete herritarrei; guztira, 72 look edo proposamen izan dira. Gaztelako Atea abiapuntu hartuta, eskualdeko 41 modelok parte hartu dute gaurko ekitaldian. Amaieran, hunkituta zeuden merkatariak eta Tolosa&Co elkarteko kideak ere.
Herritar ugari gerturatu da fashion show-aren bigarren ediziora. Gehienek, eroso gozatu ahal izan dute desfileaz, antolatzaileek bertaratu direnen eskura jarri dituzten harmailei eta eserlekuei esker. Esperientzia erabatekoa izan da ikusleentzat. Mattin Zeberio DJ-ak girotu du ekitaldia, Komorebi Produkzioak taldeko Garazi Egigurenek eta Eneko Galdosek dantza emanaldia egin dute, eta ekitaldiaren amaieran, bertako eskaintza gastronomikoa izan da food truck gunean, Goyako hanburgesekin eta Iparrako artisau garagardoekin.
Ekitaldi honen helburu nagusia tokiko merkatari eta saltokiei ikusgarritasuna ematea izan da. Antolatzaileek adierazi dutenez, horretarako, egunerokotasunerako proposamen errealak, hurbilak eta eskuragarriak erakutsi dituzte. Horiek guztiak herriko saltokietan osatu dituzte, eta fashionshow.tolosandco.org webgunean ikusi daitezke. Saltokietan bertan ez ezik, Tolosa&Co elkarteak eskuragarri duen online salmentarako Gogoko zerbitzuaren bitartez ere eskuratu ahal izango dira.
15. urteurrena
Gaurko ekitaldiak ospakizun berezi batekin bat egin du, gainera. Tolosa&Co elkarteak 15 urte bete ditu aurten, hurbileko merkataritza indartzeko eta herriko bizitza dinamizatzeko lanean. «Elkarbanatutako bide hori eskertzeko modua ere izango da desfile hau», adierazi dute antolatzaileek.