Galtzaundi Tolosaldeko Euskaltzaleen Elkarteak apirilaren 30ean egingo du Tertulia Literarioko hurrengo saioa. Galtzaundiren egoitza berrian (Plaza Berria, 1) izango da, 19:00etan, eta Yolanda Arrieta idazle etxebarritarra bertaratuko da, Etxe bat norberarena eleberriaren inguruan hitz egitera. Yurre Ugartek dinamizatuko du saioa.
Duela gutxi, ibilbide oso bati aitortza egiteko Urrezko Kalabaza jaso zuen Arrietak –irudian– Ahoz Aho Jaialdiaren amaiera ekitaldian.
Hona hemen eleberriaren sinopsia: Habiaren babesa. Bake operatzailea. Aukerako ohikotasuna. Nondik-abiatu berri bat. Nora-itzuli atsegin bat. Ezeren faltarik ez. Dena bertan. “Virginia Woolf-en gela bat norberarena «denen onerako» gela bilakatu da: arropak zintzilikatzeko barrunbe, lekurik ez dutenen biltegi, gonbidatuentzako logela edota guztiak batera. Horrexegatik, andre idazleak etxe bat nahi du. Bere gogotik aritzeko etxe bat. Bere zahartzaroari opatzeko etxe bat. Liburu hau da Yolanda Arrietak etxe horri eskaintzen dion epopeia egunerokoa”.