Azken urteetako bideari jarraituz, Ahoz aho jaialdiak Urrezko Kalabaza eskaini ohi dio ahozkotasunaren bide desberdinetan lan nabarmena egin duten hiru pertsonei. Gaur goizean Tolosan jaso du Urrezko Kalabaza horietako bat Yolanda Arrieta (Etxebarria, Bizkaia, 1963) idazle eta kontalariak, «ahozkotasuna bere idazlanak bere kontalari grinarekin maisuki uztartzen jakin duelako, istorio ederrak oparituz».
Ahozkotasunari zerbait eskaintzen dion elkarte edo proiektu bati eman ohi diote bigarren Urrezko Kalabaza eta aurtengo udazkenean Valentzian izan ziren kaltetuen aldeko ekimen solidario batek eraman du aurten saria. Contes per la dana izeneko kolektiboak ipuin kontaketak antolatu zituen Espainiako estatuko hainbat tokian. Kontalari horien izenean Eva Andujarrek jaso du saria.
Amaitzeko, euskal kontalari bati urtero egiten zaion errekonozimendua jaso du aurten Maite Franko irundarrak. Eskertuta jaso du saria.