Tolosako Udalak pasa den martxoaren 26an eman zuen Tolosan lehen aldiz udaleku irekiak egingo zirenaren berri. Bada, nabarmendu duenez, «arrakastaz» itxi dute udaleku horietarako aurretiazko izen-ematea: 300 haur eta gaztetxok baino gehiagok egin dute eskaera. Guztiak aztertu eta egiaztatuta, 294k betetzen dituzte ezarritako baldintzak eta horiek guztiek eskuratu dute plaza, behin-behinean. Onartutakoen eta baztertutakoen zerrendak ikusgai daude Tolosa.eus webgunean; era berean, gazteen gurasoei edo tutoreei SMS eta posta elektronikoz jakinarazi zaizkie emaitzak.
Orain, behin betiko izen-ematea egin beharko dute onartutakoek. Kasu honetan, dokumentazio osagarria aurkeztu beharko dute. Apirilaren 28tik maiatzaren 8ra egin ahal izango dute, hiru bide hauetako bat erabilita: online, udaleko webguneko egoitza elektronikoan, tramiteen atarian –BakQ-a beharrezkoa da–; presentzialki, Udaten –astelehenetik asteazkenera, 07:15-14:15; ostegunak, 07:15-19:00; ostiralak, 08:15-14:15–; edo kultur etxean –astelehenetik ostiralera, 17:00etatik 19:00etara–. Udalekuen inguruko informazio guztia eta oinarriak udalaren webgunean kontsultatu daitezke.