Jo izan dutelako gara dokumentalak Tolosako inauterietan aritutako hainbat musikariren lana aitortzen du. «Dokumental honek begirada atzera bota eta aurreko mendean hasita, Tolosako inauteriaren eta zehatzago inauterietako musikaren nondik norakoak ulertzeko bidaia egitera proposatzen digu», esan du Pablo Dendaluze egileak.
Dokumentalean musikarien bizipenak bildu ditu eta baita argazki zaharrak ere. Protagonista nagusiak aurreko belaunaldiko musikariak dira; Paotxa, Tximin, Canario, Amado, Pipar, Arricibita, Ropero... eta beraien musika arloko hastapenetatik gaur egunera bitarteko kontakizuna egiten dute. «Hain zuzen ere, kuadrilla honek egindako lanari nolabaiteko errekonozimendua egiteko eta eskerrak emateko nahiarekin sortutako egitasmoa ere badela esango nuke», gaineratu du.