Azken urteetan egin izan den moduan, Tolosako Udalak 12 trafiko laguntzaile kontratatuko ditu inauterietarako, zehazki Zaldunita, Astelenita eta Asteartita egunetarako –martxoak 2, 3 eta 4–. Udaltzaingoaren laguntzaile jardungo dute, eta herriko zirkulazioa kontrolatu eta antolatuta mantentzen laguntzea izango da betebehar nagusia.
Laguntzaile aritzeko hainbat baldintza bete behar dira: 16 urte beteta edukitzea eta eskolan graduatua izatea, lehen mailako lanbide heziketa edo baliokideren bat edukitzea eta euskara jakitea.
Astelehenean egongo dira eskuragarri oinarri guztiak eta hautaketa prozesuan parte hartzeko eskaera orria, lan eskaintzen orrialdean. Egun horretan zabalduko dute eskaerak aurkezteko epea, eta interesdunek otsailaren 5eko 13:00ak bitarte izango dute aukera. Presentzialki Udaten egin ahal izango da; aldiz, telematikoki egin nahi izanez gero, tramiteen ataleko erregistro orokorraren bidez aurkeztu beharko da eskaera orria beteta.