Urtero bezala, udal musika bandak antolatu du emanaldia, eta aurten, Hodeiertz abesbatza, Tolosako Udal Txistulari Banda, GiroArte Dultzaina Taldea eta Isidro Larrañaga Akordeoi Orkestra aritu dira bandaz gain. Urteko kontzertu bereziena izan ohi da taldeentzat, besteak beste, obra berriak estreinatzeko baliatzen baitute hitzordua, eta halaxe egin dute gaurkoan ere.
Esaterako, Hodeiertz abesbatzarentzat lehen kontzertua izan da Victor Galvan zuzendari berriarekin. Hiru obra estreinatu dituzte, horietako bi, Txoria Txori eta Ama begira zazu, Galvanek berak moldatutakoak.
Udal txistulari bandak, Eduardo Mocoroaren txisturako moldaketa bat barne, hiru obra interpretatuko ditu Iñigo Azkueren zuzendaritzapean.
GiroArte Dultzaina Taldeak, berriz, bi kantu jo ditu, horietako bat lehen aldiz. Perkusio instrumentuek lagunduta aritu dira, eta estreinakoz batu dituzte dultzainak, metalezko instrumentuak eta sokazko laukote bat.
Isidro Larrañaga Akordeoi Orkestrak hiru obra eskaini ditu, horietako bat Garena taldearekin elkarlanean.
Eta azkenik, udal musika bandaren txanda izan da. Bi obra interpretatu ditu, tartean, Armeniako bost folk kantuz osatutako pieza berezi bat, musika banden errepertorioetan ohikoak ez diren erritmoak uztartzen dituena.