Urriko osoko bilkuran, behin betiko onartu zuen Tolosako udalbatzak 20.1 Amarotz Paper-Fabrika eremuko hiri-antolamenduko plan bereziaren bigarren aldaketa. Bada, orain, bertan gauzatuko den proiektuari buruzko azalpenak emateko bilera irekia egingo dute, urriaren 18an, astelehena. Auzo Etxean izango da saioa, 18:30ean, eta herritar orok izango du bertaratzeko aukera.
Saio horretan, proiektuaren xehetasunak aletuko dituzte Eusko Jaurlaritzaren Visesa –Vivienda de Suelo de Euskadi SA - Euskadiko Etxebizitza Eta Lurra– sozietate publikoko eta udaleko ordezkariek. Visesak babes publikoko 192 etxebizitza eraikiko ditu, Amarotz paper fabrika zegoen orubean. 2.1 partzelan, alokairu sozialeko 111 etxebizitza eraikiko ditu; 2.2 partzelan, berriz, 81.
Bi sustapenen baimenak urte honen amaierarako edo datorrenaren hasierarako eman ahal izatea da asmoa. Etxebizitzak eraikitzeko guztira 1.152.000 euroko diru ekarpena egingo dio udalak Visesari, 6.000 eurokoa etxebizitza bakoitzeko.