Tolosako Erraldoi eta Buruhandien Konpartsak «irmoki gaitzetsi» ditu azken egunotan argitara atera diren eta «konpartsa inplikatu» duten gertakariak. Konpartsak adierazi du urte luzez aritu direla komunitatearen alde lan egiten «elkarbizitzan eta errespetuan oinarrituta, tokiko kultura sustatzen». «Bereziki etxeko txikienekin gabiltza lanean, horiek baitira gure jardueren erdigunea eta harro gaude herriarekin eraiki dugun loturaz», gaineratu du.
Konpartsaren helburua «ingurune seguru eta osasungarriak» bermatzea dela nabarmendu du eta bide horretan lanean jarraituko duela gaineratu du. Zentzu horretan, «berdintasunarekin, errespetuarekin eta elkarbizitzarekin» duen konpromisoa berretsi du.
Honen aurrean, biktimei elkartasun osoa adierazi die eta herritar guztientzako «inklusio eta segurtasunezko giro osasuntsua mantentzeko» lanean jarraitzeko konpromisoa nabarmendu du: «Konpartsan ez dugu balio horien aurkako jarrerarik onartzen, ezta inoiz onartuko ere».