Gaur eta bihar, kotxerik gabeko guneak izango dira San Frantzisko pasealekua eta Rondilla kalea. Bertan, ohikoak izaten diren kotxeen espazioetan loreontziak eta eserlekuak kokatu dituzte, Mugikortasun Astearen markoaren barruan.
Ekimenaren bitartez Tolosako Udalak jarrera jasangarriagoak bultzarazteko asmoa du. Esaterako, erdigunetik kotxeak kentzeak ekar ditzakeen onurak azpimarratuz: «Oinezkoentzako kaleak, komertzio txikiarentzat bultzada». Edota kontzientzia sortu kotxeek hartzen duten espazioaren inguruan; izan ere, kotxe bakoitza «batez beste, bere bizitzaren %95 geldirik» dagoelako.
Bigarren eskuko azoka
Goizean goiz, bizikleten bigarren eskuko azoka egon da kokaturik San Frantzisko kaleko errepidean. Jende ugari bertaratu da, bizikletak probatu eta tratua egin asmoz.
Zumardia taldeak bere postua jarrita zuen bertan, haur eta helduentzako aisialdi eredu biziaren aldeko aldarria eginez.
Honela, eguraldiak laguntzen badu, Mugikortasun Astearen egitaraua bihar artean luzatuko da Tolosan.