2024ko inauterien inguruko tolosarren iritzia bildu nahi du Tolosako Udalak, zer zuzendu edo hobetu jakiteko, eta ideia eta proposamen berriak jasotzeko. «Festek ertz asko dituzte, jende eta talde askok parte hartzen baitute, eta guztien arteko elkarbizitza eta oreka bat topatu nahi ditugu», azaldu dute.
Hori dela eta, balorazio-galdetegi bat jarri dute herritarren eskura; hain zuzen, 16 urtetik gorakoentzat, horiek bakarrik erantzun ahal izango dutelako, pertsonako behin. Martxoaren 21era arte egongo da erantzuteko aukera. «Galdetegi honen bidez jasotako erantzunek norabide hori errazago zehazten lagundu ahal izango digute. Eman lasai zure iritzia, beti ere errespetuz», adierazi dute udaletik.