Orixe institutua aurrera doa Erasmus+ proiektuarekin, eta hainbat ekintza abiatu ditu. Batetik, batxilergo lehen mailako 22 ikasle Belgikara joan ziren astebetez, Sint Aloysius eskolara. Orain, belgikarren txanda da eta igandera arte 22 ikasle belgikar izango dira eskualdean. Rainbow Nations izeneko proiektuaren baitan, garapen jasangarriko 17 helburuetako batzuk ari dira lantzen inguruko herri zein toki ezberdinak ezagutuz.
Bestetik, apirilean, DBH 3ko 22 ikasle Herbeheretako Groninga herrira joango dira astebetez, Haren Lyceum eskolara. Atzerriko ikasleak urrian izan ziren Orixen eta orduan hasitako proiektua lantzen jarraituko dute Community Manager irakasgaiko ikasle euskaldunek, informazioa eta medioen alfabetatzearen inguruan.
Horrez gain, Orixeko DBH 4ko ikasle bat Irlandako Glenamaddy eskolan egon da aurtengo lehen ebaluaketa egiten, eta urrian, bi irakasle Maltan izan ziren Artificial Intelligence in Education izeneko ikastaroa egiten. Hau guztia ERASMUS + finantzaketari esker izan da.