Partidaren aktan jasotzen denez, bigarren zatiko 48. minutuan izan zen Viacheslav Kobinen erasoa epaileari. Horren ondorioz, bertan behera geratu zen partida eta 15-17ko markagailuarekin irabazi zuen Saieko taldeak neurketa. Igande goizean Tolosa CF Eskubaloiak idatzi bat zabaldu zuen, «atsekabea» azalduz geratutakoarekin. «Barkamena eskatu nahi diogu epaileari, Saiekoko senior nesken taldeari zein klubari, bertan ziren zaletu guztiei, eta Gipuzkoako klub guztiei, federazioari eta epaile talde osoari». Klubetik aukera izan dute epailearen zein Saiekoko arduradunekin hitz egiteko, zuzenean beraiei «barkamena eskatuz eta elkartasuna eskainiz». Klubetik gaineratu dutenez, «bai epaileak zein Saieko klubak gure taldeko jokalarien jarrera nabarmendu zuten gertatu zen egoeraren aurrean».
Larunbatean bertan Tolosa CF Eskubaloiak eta Viacheslav Kobinek elkarrekin adostu zuten entrenatzaileak ez duela jarraituko klubean. Era berean, Tolosa CF Eskubaloitik azaldu dutenez, «gurean edozein motako indarkeriaren aurkakoak gara, eta bide horretatik jarraitu nahi dugu eskubaloia bultzatuz, errespetutik, berdintasunetik, eta betiko ilusioz gure neska eta mutilen alde».