Aiz-Orratz elkarteak antolatutako urteroko danborrada kalean izan da gaur arratsaldean, Zaldunita Bezperan. Eguraldi txarra zegoen emanda gaurkorako, baina eguraldiak hobera egin duela ikusita, elkarteko kideek 15:3ean erabaki dute ekimenarekin aurrera egitea.
Laskorain, Herrikide eta Samaniego ikasleek hartu dute parte danborradan. 500 ume inguru kontatu ditu antolakuntzak. Geltoki kaletik abiatu eta San Frantzisko ibiltokia zeharkatu ondoren Euskal Herri plazan elkartu dira danbor jotzaile guztiak. Topic-eko balkoira igo dira mikelete eta kantinerak eta handik agurtu dituzte guztiak. Ibilbide guztian dantzan ibili dira kosakoak.
Urduri zeuden gaztetxoak danborrada abiatu aurretik eta baita Aiz-Orratz elkarteko kideak ere. Igor Hilario antolatzailearen esanetan danborrada da Aiz-Orratzek inauterietan antolatzen duten ekitaldi garrantzitsuenetakoa. Herritarrek egiten dieten harrerarekin oso pozik agertu da Hilario.
Aurten, marrazki eta mozorro lehiaketan parte hartu duten gaztetxoek danborradaren atzetik joan den txu-txu trenean joateko aukera izan dute.