Mozorro original bat aukeratzea ez da tolosarrok inauterietarako duten lan bakarra. Horrekin batera, askok eta askok karrozak prestatzen dituzte zaldunitan eta asteartitan kalera irteteko. Eta hala egin dute aurtengoan. Hain zuzen, bihar, Tolosako kalean ikusi ahal izango dira azken hilabetean egindako lanaren emaitza. Gaur, berriz, egurrez, margo ontziez, burdin barrez eta erremintez beteta daukate Ferialekua. Dagoeneko prest dituzte karrozen oinarriak, eta askok eszenatokia ere. Duela hilabete kuadrila ugariz beteta zegoen Ferialekua, eta gaur gutxi batzuk besterik ez dira euren karrozari azken ukituak ematen ari zaizkiela Ferialekuan.
Astelenitarako azken entseguak
Astelenitan, berriz, Tolosako aisialdi taldeek hartzen dituzte kaleak. Aurten, Atsedena, Kazkabarra, Kirikiño, Ttenttek eta Txiribitu taldeek jarriko diote musika Astelenitari, eta horiek ere azken entseguak izan dituzte gaur.
