Zaldunita bezperako lehen hitzorduetako bat izan ohi da Erraldoi eta Buruhandien kalejira. Eguraldia lagun ez izan arren, aurten ere ez dute hutsik egin eta, urtero bezala, Gernikako Arbola plazatik atera da konpartsa goiz erdian. Ordurako, herritar ugari zituzten zain, haur eta gaztetxoak, familian gehienbat, herriko kaleetan barrena haien atzetik saltoka edo korrikan ibiltzeko prest.
Ibilbidean zehar, geldialdiak egin dituzte eta plaza zaharrera iristean dantzarako tartea hartu dute sei erraldoiek. Tolosako Dultzaineroak aritu dira doinu alaiekin erraldoiei mugimendurako erritmoa jartzen. Bien bitartean, buruhandiak ere hor ibili dira, maskuriak eskuan zituztela, korri egiteko gogoarekin zegoenari jarraituz eta beldurra zuenari bostekoa emanez.
Tartean, Aiz-Orratz elkarteko Txu-Txu Trenarekin ere egin dute topo. Lapurdi plazatik abiatuta, herriko kaleen barrena murgildu da. Bidaiariek erraldoi eta buruhandiak ikusi eta agurtzeko aukera izan dute bidean.