Urtero bezala, Kabi Alai elkarteko konpartsa arduratu da inauteriei hasiera eman dien antzezpena egiteaz. Suziria lehertzeko minutu gutxiren faltan, parodia egin dute elkarteko ordezkariek. Aurten, Usabal kiroldegia itxita egon izanaren ondorioak irudikatu dituzte Tolosako udaletxe atarian.
Usabal kiroldegia hainbat hilabetez itxita egon denez, herritar askok «kiloak» hartu dituztela esan dute, eta azterketa medikua egin diete udalbatzako kideei. Inauterietako udalbatzako alkate izan da azkenekoz Patxi Amiano, eta bere ordezko izango den Kabi Alai elkarteko Ainhoa Onsalok hartu du bere lekukoa tartean. Beraz, lehenengoz, emakumea izango da inauterietako udalbatzako alkatea.
Ondoren, txupinazoaren txanda izan da. Aiz Orratz elkartea izendatu du aurten Kabi Alai Kuttun, eta elkarteko ordezkariek bota dute txupinazoa. Suziria lehertuta, Hausterre Egunera bitarte etenik gabe luzatuko den festari hasiera eman diote.