Inauterietako karrozetan eta konpartsetan parte hartzeagatik Tolosako Udalak eskaintzen dituen diru laguntzak eskatzeko epea gaur zabaldu da, eta hilaren 30a izango da eskatzeko azken eguna.
Guztira, 45.000 euroko laguntza eskainiko dute, eta helburu nagusia da inauterietan karrozen eta konpartsen parte hartze «aktiboa» sustatzea eta indartzea. Horrez gain, baldintza batzuk betez gero laguntza handiagoa jasoko dute, kasurako, kideen erdia edo gehiago emakumezkoak badira, %10 gehiago jasoko dute; baita emanaldia euskara hutsean egiten badute ere.
Eskaerak aurrez aurre Udaten eta telematikoki Tolosako Udalaren erregistro elektronikoaren bitartez egin behar dira. Bide beretik, udal webgunean daude eskuragarri deialdiaren inguruko informazioa, oinarriak eta eskaera orriak.