Aurten, lehen aldiz, Titirijai jaialdirako kartel lehiaketa antolatu dute Tolosako Ekinbide Etxeak eta Topic-ek. Uztailean aurkeztu zituzten lehiaketan parte hartzeko bete beharreko baldintzak, eta urriaren 9an amaituko da lanak aurkezteko epea. Mundu liluragarri bat gure eskuartean da gaia.
Bada, gaztetxoei kartel lehiaketan parte hartzera animatzeko, tailerra antolatu dute ostiral honetan, hilak 29, Tolosako Gazte Topagunean. 17:00etan hasiko da eta bi orduko iraupena izango duela aurreikusten dute.
Kartel lehiaketaren irabazleak 100 euroko erosketa bonua eskuratuko du Tolosa&Co Merkataritza Elkartearen eskutik. Gainera, parte hartzaile guztien artean, lau lagunentzako sarrerak zozketatuko dituzte Titirijai jaialdiko ikuskizun baterako.
