Saharako errefuxiatu kanpamentuetatik zortzi haur etorri dira eskualdera uda pasatzera; hiru Tolosara, bat Irurara, bat Gaztelura, bat Larraulera, bat Adunara eta beste bat Amasa-Villabonara. Tolosaldea Sahararekin elkarteak 2000. urtetik martxan duen Oporrak bakean programaren bitartez etorri dira, Aljeriako basamortuko berotik ihesi. Hain zuzen, aurreko astean iritsi ziren Tolosara, eta gaur eman diete ongi etorria Tolosako udaletxean.
Bertan, Tolosaldea Sahararekin elkartea ez ezik, eskualdeko zenbait alkate eta ordezkari politikoak izan dira. Andu Martinez de Rituerto Tolosako alkateak hartu du hitza, eta programaren garrantzia azpimarratu du: «Ondo pasatzera etortzen zarete, lagun berriak egin eta leku berriak ezagutzera, baina osasun ariketak egiteko ere baliatzen duzue bidaia».
Familiek egiten duten lana eta esfortzua eskertu nahi izan du alkateak, eta bere esanetan, «oso ondo islatzen du gure herriarentzat oinarrizkoak diren baloreak; eskuzabaltasuna eta elkartasuna».
Halaber, alkate eta ordezkari politiko guztien izenean Mendebaldeko Sahararen aldeko aldarria ere egin du, «herri sahararra, behingoagatik, errespetatzea, eta urte luzeetako arazo honi interbide bat eman diezaioten sahararrak aske bizi daitezen».
Ekitaldiaren ostean, Zumardi Handira joan dira eta bertan Zumardiako gurpilguneak bizikletak oparitu dizkiete haurrei, bizikletako kasko eta bestelako osagarriekin. Horren ostean, bizikletan jolasean aritzeko tartxoa izan dute, eta merienda ere egin dute bertan.