Oria ibaia agertoki bihurtu zen atzo. Izan ere, Tolosa CF klubaren eta Berazubi estadioaren ehun urteen ospakizuna biribildu zuten Urdiñak 100 urtez emanaldiarekin. Hodeiertz abesbatzako kideek eman zioten hasiera ekitaldiari. Berazubi estadio ingurutik hasita Zerkausiaren pareraino abesten joan ziren bi txalupa handiren gainean.
Ondoren, Oria ibaiaren gainean jarritako oholtzan zeuden artisten txanda izan zen. Tolosako musikari eta taldeak izan ziren bertako protagonistak: Verde Prato, Mirua eta Tenpora, azken horretan Elene Arandia abeslariarekin. Horrez gain, haize hirukotea, hari laukotea eta musikari hirukoteak ere izan ziren ur gaineko oholtza horretan.
Zuzeneko emanaldiez gain, agertoki horren inguruan Tolosa CF klubarekin lotura estua duten gonbidatuak ere izan ziren, Antton Telleriak gidatuta. Horren adibide, Armando Roca eta Txitxi Orbegozo izan ziren, eta klubaren historia pasarteen bitartez kontatu zuten.
