Lehertu da suziria eta hasi dira San Joan jaiak Tolosan. Erraldoi eta Buruhandien konpartsaren erritmora iritsi dira herritarrak Plaza Zaharrera, txupinazoa bertatik bertara ikusteko. Plaza jendez bete da, bazen gogoa festei hasiera emateko.
Txupinazoa Julian Rodriguez Gainditzen elkarteko kideak jaurti du, eta esan duenez, «elkarteak lan handia egin du urteetan zehar Tolosan bizi garen pertsona gorren eskubideen eta ongizatearen aldeko borrokan». Bide horretan lanean jarraitu nahi dutela esan du. «Egin dezagun topa jai inklusiboaren alde, kolektibo guztiok izan dezagun gozatzeko aukera». Tolosa, «aniztasunarekiko errespetua duen herri erreferentea» izan dadin eskatu du. Rodriguez bera izan da, elkarte osoaren izenean, suziriari su eman diona.
Zeruan suziria lehertzearekin batera, Iraunkorrak txarangak lehen piezak jo ditu plazan bertan, eta haur eta gaztetxoek udaletxeko balkoitik botatako gozokiak biltzen aritu dira bitartean. Afalostean, 22:00ak aldera, San Joan sua piztuko dute Andre Maria plazan, udalbatza bertan dela. Eta ondoren, Udaberri dantza taldeak, Hodeiertz abesbatzak eta Tolosako Udal Musika Bandak jardungo dute.
