Tolosako gau eskolan hasi zen irakasle Otamendi; hura izan zen bere ibilbide profesionaleko lehen lanbidea. Gero, 1982an, Aitzol Euskaltegia sortu zuen Tolosako Udalak, eta bertara joan zen, beste irakasleekin batera. «Kiribil laboral bat egin dut, euskarazko klaseak ematen hasi, eta euskarazko klase bat ematen amaitu dut nire lan ibilbidea. Esaten den moduan, hiltzailea beti itzultzen da krimenaren tokira», azaldu du.
Euskaltegian goizeko klaseetan dabiltzan ikasleekin solasean aritu da eta elkar ezagutzeko aukera izan dute. Bere ibilbidearen nondik norakoak azaldu dizkie ikasleei, baita duela lau hamarkada euskaltegian lanean nola aritu zen ere. Argi ohartarazi die: «Euskara ez da hizkuntza zaila».