Bihar, ekainak 17, kuadrillen eguna ospatuko da Tolosan, eta horren harira, aldaketak izango dira trafikoan. Batetik, Rondilla kalea ibilgailuentzat itxita egongo da 10:00etatik 22:00etara. Ondorioz, autobusek ezingo dute erdigunera sartu eta ibilbidea herritik kanpo egingo dute. Hori horrela, Rondilla zein San Frantzisko ibiltokiko autobus geltokiak itxita egongo dira eta Santa Klarara lekualdatuko dira.
Bestetik, Rondilla kalearen itxierarekin batera, San Frantzisko ibiltokia ere ibilgailuentzat itxita egongo da eguerdia bitarte, Oriako Txirrindulari Elkarteak antolatutako kirol proba dela eta. Horrez gain, larunbateko ohiko azoka, Euskal Herria plazakoa, hain zuzen, San Frantzisko ibiltokira lekualdatuko dute, plazan kuadrilla eguneko bazkarirako prestatze lanak egingo dituztelako.
Gune Morea Emakumeen Etxean
Jai berdinzaleen aldeko apustuan, inauterietan egin bezala Gune Morea, indarkeria matxistarik gabeko gunea, kokatuko dute larunbatetik iganderako gauean, Andragora Tolosaldeko Emakumeen Etxean. Informazio eta arretarako gunea izango da eta 00:00etatik 05:00etara egongo da zabalik.