Tolosako Pasaban SA enpresako langileak mobilizazioetara itzuli ziren pasa den asteartean. 11:00etatik 13:00etara lanuztea egin zuten enpresan, eta gainera, elkarretaratzea burutu zuten Trianguloa plazan. Gaur ere gauza bera egin dute, baina elkarretaratzeaz gain, manifestazioa egin dute San Frantzisko pasealekuko 45. zenbakiraino.
Langileek honakoa eskatzen dute, besteak beste: lizentzietan hobekuntzak, KPI-aren balorearen araberako taula bat, lan ordutegian malgutasuna eta muntai lanengatik kanpora joan behar duten langileen kasuan, 59 urtetik gorakoentzat hautazkoa izatea. ELA eta LAB sindikatuek duela astebete adierazi zutenez, hitzarmenaren negoziazioa «asko» ari da luzatzen «enpresaren jarrera dela eta».
Hurrengo asteetan, ekainaren 20ean eta 27an, berriz burutuko dituzte lanuzteak, 11:00etatik 13:00etara; manifestazioak ere egingo dituzte egun horietan, gaurko ibilbide berarekin.
Asuncioneko langileen babesa
Pasaban enpresako langileez gain, Asuncion Klinikako langileak ere Trianguloan ziren gaur goizean, eguerdian eman baitiote amaiera 24 orduko kanpaldiari. Pasabaneko langileen ordu berean elkarretaratzea egin dute, eta ondoren, beraien atzetik atera dira manifestazioan, babesa erakusteko.