Asuncion klinikako langileek, euren lan baldintzak hobetuko dituen hitzarmenaren aldeko borrokarekin jarraitzen dute. Gaur eguerdian hasita, 24 orduko kanpaldia egiten ari dira, Tolosako Trianguloa plazan. Gaua bertan pasako dute langileek, eta bihar eguerdira arte bertan jarraituko dute.
2021etik berritu gabe daukate lan hitzarmena. Arantxa Dorronsoro Asuncion klinikako erizainak eta komiteko LABeko kideak azaldu duenez, ordutik zazpi bilera inguru egin dituzte zuzendaritzarekin, baina «beraien proposamenak geroz eta okerragoak dira». Nabarmendu duenez, besteak beste, KPIaren araberako soldata igoera eta 35 orduko lan astea eskatzen dituzte.
Eros-ahalmena eta baldintza duinak bermatu daitezen eskatzen ari dira, LABek adierazi duenez, «bereziki, aintzat hartuta beraiek egiten dutena zerbitzu publikoa ematea dela, beste leku batzuetan Osakidetzak egiten duen lana, hain zuzen ere».
Mobilizazioak
Maiatzean hamar greba egun egin dituzte, ekainean zazpi egingo dituzte eta irailerako beste zazpi aurreikusi dituzte. Ekainaren 19a eta 20a izango dira datozen bi greba egunak, eta irailean, 13, 14, 15, 18, 19, 28 eta 29an egingo dute greba. Bihar, 11:30ean, elkarretaratzea egingo dute Trianguloan eta kanpaldiari amaiera emango diote.
Hiruzpalau orduko txandak antolatuta ari dira kanpaldia egiten klinikako langileak. Txanda bakoitzean, hamabost langile inguru daude bertan, hitzarmen duinaren alde. «Borrokan jarraitzeko prest gaude», esan du Dorronsorok.
