Tolosaldeko Itaiak indarkeria matxistari erantzun antolatu bat eman nahi dio, eta horretarako, bilera irekia burutuko du larunbat honetan. Tolosako kultur etxean izango da saioa, 12:00etan.
Bestetik, San Joanetan etxera bakarrik ez itzultzeko, etxeratze kolektiboak jarriko dituzte martxan. Elkargune izango den Trianguloa plazatik abiatuta, Tolosako auzo ezberdinetara eta Ibarrara lagunduta itzultzeko aukera eskainiko dute. «Tamalez, badakigu jai giroan erasoak gertatzeko baldintzak areagotu egiten direla, eta ondorioz, indarkeria matxista kasuak nabarmen hazten direla», adierazi dute Itaiatik.
Etxeratzeak antolatzeko, galdetegi bat zabaldu dute. «Egun eta ordu egokienak zein diren jakin nahi dugu, baita testuinguru honi aurre egiteko bitarteko efektiboak sortzeko antolatzeak duen garrantzia azpimarratu eta gurekin batera antolatzeko gonbidapena luzatu ere», gaineratu dute.