Uztailaren 23tik 29ra, Europako Gazteen Jaialdi Olinpikoa (FOJE) ospatuko da Mariborren (Eslovenia). Espainiako Igeriketa Federazioak, Gijongo Neguko Espainiako Txapelketa jokatu ondoren, lehiaketako igerilarien behin-behineko zerrenda argitaratu du. Hautatutakoen artean dago Mattin Zubeldia Oteiza, Tolosaldea Igeriketa Taldeko igerilaria. Tolosar gazteak bizkar estiloko 200 metroko proban Europako txapelketan parte hartzeko eskatzen zen gutxieneko marka lortu zuen, Gijonen. Gainera, 16 urtekoen finalean bigarren postuan sailkatu zen.
Federazioko ordezkariek zehaztu dutenez, behin betiko proba-programa duten kirolarien deialdi ofiziala eta entrenatzaileen eta laguntza-taldearen deialdia txapelketaren aurreko asteetan argitaratuko dituzte.