Madrilgo Maria Guerrero antzokian dagoen Arte Eszenikoen eta Musikaren Nazio-Institutuak, zenbait pertsona omentzen ditu urtero, kulturaren alde egin duten edo egiten duten lanagatik; beraien izenak eraikin historikoaren fatxadan kokatzen dituzte. Aurten, besteak beste, Idoya Otegi omendu dute, eta bere izena antzokiko sarreran egongo da urte guztian zehar.
Kultura arloan egindako gestioagatik eta Tolosako Topic museoaren sortzaile gisa egindako lanagatik omendu dute tolosarra. «Profesionaltasuna eta lanerako gaitasuna bateratuta, Idoyaren lana funtsezkoa izan da txotxongilo-antzerkia duinago egiten laguntzeko eta Tolosak Europan bakarra den zentro berezi bat duela uste izateko», adierazi dute Topic-etik. Bere osasun egoera ahuldu egin da azken urteetan, eta horrek aurreko urtean garaiz erretiratzera behartu zuen. Azaroan omenaldi beroa jaso zuen, eta bertan izan ziren Topic posible egiten duten erakundeetako alderdi politiko guztietako ordezkariak, baita txotxongiloen antzerkiari lotutako kultura-munduko ordezkaritza zabala ere.