Joseba Sarrionandiak idatzitako testuak ditu Kristalezko bihotza ipuinak, eta David Azurza tolosarrak jarri die musika testu horiei. Davidek berak zuzenduko du igandeko kontzertua eta Hodeiertz abesbatzarekin batera parte hartuko du Bilboko Kamerata Abesbatzak, Irma Rutkauskaitek zuzenduta. Goi mailako musikariak ere izango dira bertan: Garikoitz Mendizabal txistularia eta Aitor Furundarena akordeoi jotzailea; Eduardo Mokoroa Udal Musika Eskolako perkusio taldea ere beraiekin batera ariko da. Narratzailea, berriz, Andoni Aleman izango da. Sarreren prezioa 5 eurokoa izango da.
2018an, sanjoan festen barruan, Euskal Pizkundea plazan egin zuten estreinaldia. Orain, bestelako leku batean egingo dute emanaldia. «Ez da haurrentzako ipuina», adierazi dute abesbatzako kideek; 14 urtetik gorakoei zuzendutako saioa dela gogorarazi dute.
Duela bi aste, Palmako (Mallorca) San Felipe Neri elizan abestu zuen Hodeiertzek, Festival de Classica 2022 jaialdian.