Urdin-horiz tindatu da gaurkoan Leidorreko oholtza. Ukrainako Sofia Chamber Choir abesbatzak sari banaketa ekitaldian Ukraina gerran murgilduta dagoela ahaztu gabe, herrialdearen koloreak paparrean jantzi eta euren bandera zabaldu dute. Negar malkoak ere ikusi dira abeslarien aurpegietan.
Ganbera abesbatzen polifonia mailako lehen saria izan da Ukrainako Sofia Chamber Choir abesbatzarentzat, folklore alorrekoarekin batera; Kutxaren Sari Nagusia jaso dute; 2023ko apirilaren 29an Hungariako Debrecen-en ospatuko den Abesbatza-Kantuaren Europar Sari Nagusirako izendapena irabazi dute eta baita Entzulegoaren Saria ere. 53. edizio honek irabazle argia utzi du eta abesbatza zaleak pozik txalotu dute Xabier Sarasola mahaiburu izan duen epaimahaiaren erabakia.
Euskara
Saridunen artean euskaldunik ez bazegoen ere, euskara behin baino gehiagotan entzun zen ahots aingerutarretan. Esaterako, Estoniako Ellerhein Girls’ Choir-ek euskal abesti interpretazio onenaren saria jaso zuen Junkal Gerreroren Errota abestiagatik.
Leidor bero
Gaurkoan Leidor beteta egon da eta bero jarraitu dute ikus-entzuleek sari banaketa ekitaldia euren eserlekuetatik; partaide izanik, txaloak falta gabe, eta tokatzen zenean Agur Jaunak abestuz ere. Sari banaketa ekitaldia Aitor Elduaien eta Nerea Pikabea kazetariek gidatu dute, ikus-entzuleekiko konplizitatea erakutsiz.
SARIDUNAK
Euskal abesti baten interpretazio onena
Ellerhein Girls’ Choir (Estonia), Junkal Guerreroren Errota abestiarengatik.
Haur abesbatzak
Lehen saria. Riga Cathedral Girls’ Choir Tiara (Letonia).
Bigarren saria. Adolf Fredrik’s Girls’ Choir (Suedia).
Hirugarren saria. Veus – Cor Infantil Amics de la Unió (Katalunia).
Ganbera abesbatzak, polifonia
Lehen saria. Sofia Chamber Choir (Ukrania).
Bigarren saria. St. Stanislav Girls’ Choir (Eslovenia).
Hirugarren saria. Brigham Young University Singers (AEB).
Ganbera abesbatzak, folklorea
Lehen saria. Sofia Chamber Choir (Ukrania).
Bigarren saria (ex aequo). Brigham Young University Singers (AEB) eta St. Stanislav Girls’ Choir (Eslovenia).
Hirugarren saria. Mixed Choir Maska (Letonia). Sari nagusia Sofia Chamber Choir (Ukrania). Entzulegoaren saria Sofia Chamber Choir (Ukrania).