Urteko azokarik gozoena egin dute goizean, Tolosan: Tolosa Goxua. Herriko gozogileekin elkarlanean, tradizioa eta berritasuna uztartuz, erreferentzialtasuna lortu duen azoka berezia da. Gaur, bertako nahiz inguruko gozoak ezagutu eta dastatzeko aukera izan da Trianguloa plazako 23 postuetan. Tolosaldeko, Euskal Herriko beste txokoetako eta Kantabriatik etorritako gozogileen 19 postu eta eztigintzako beste lau jarri dituzte.
Aurreko urteetako edizioekin alderatuta, berrikuntzak izan dira. Euskal pastela edo biskotxa izan da aurtengo protagonista. Bere tradizioa berreskuratu eta balioan jartzea helburu duen Eguzkia elkartea gonbidatu dute, eta bertako kideen laguntzarekin, euskal pastel erraldoiak 1.000 zatitan banatu, eta gerturatu diren bisitariei eman dizkiete, herriko lau gozogile artisauen laguntzarekin.