Pasa den otsaileko osoko bilkuran onartu zuen Tolosako Udalak Usabal kiroldegiko kudeaketa Bpxport enpresari esleitzea, eta erabakiaren ondotik Kirolzer enpresak helegitea aurkeztu zuen. Helegitea Kontratuen inguruko Errekurtsoen Administrazio Organoak aztertu du eta Tolosako Udalaren alde egin du. "Gauzak horrela, udalak jada abiarazi du kontratu berria martxan jartzeko prozesua", esan du.
Gehitu du esleipendun berria aurreko enpresa esleipendunarekin harremanetan jarriko dela, eta elkarlanean arituko dela aldaketa modurik egokienean gauzatzeko, "erabiltzaileek ez dezaten aldaketarik antzeman". Irailaren 1etik aurrera, hortaz, Bpxport enpresa arduratuko da Tolosako Udaleko kirol instalazioen kudeaketaz. Kontratuak hamar urteko iraupena izango du eta kontratuaren balio zenbatetsia 4.570.531,22 eurokoa da eta urteko kanona 120.000 eurokoa.
Hobekuntzak bai, aldaketarik ez erabiltzaileentzat
Udalak esan du erabiltzaileek ez dutela aldaketarik nabarituko, zerbitzu eta ordainketei dagokienean, esaterako. Instalazioetara sartzeko txartel bera erabili ahal izango da, enpresa berriak eskumuturreko sistema berria txertatuko badu ere. Poliki-poliki erabiltzaileek beren txartelak eskumuturrekoengatik ordezkatu beharko dituzte, baina hasiera batean ohiko txartelak erabili ahal izango dira.
Kontratuaren barruan hainbat hobekuntza eta inbertsio egitea ere aurreikusten dute herritarrei eskainitako zerbitzua hobetzen jarraitzeko helburuarekin eta instalazioak egoerarik onenean mantentzeko asmoz. Gauzak horrela, ordutegia zabalduko dute eta Usabal Kiroldegia irekita egongo da astean zehar 07:00etatik 22:00etara eta jai egunetan 08:00etatik 14:00etara.