Urteak zeramatzaten jubilatu eta pentsiodunek euren eguna aldarrikatzen San Joan jaietan, eta azken urteetan beraien lekua dute egitarauan. Hala, gaurkoan, Harizpe elkartean elkartu dira hamaiketakoa egiteko, eta eguerdian suziria botatzearekin batera hasi dute festa giroa.
Alde Zaharrerantz abiatu dira gero, txaranga eta guzti, jai giroa bertan zabaltzera. Bazkarirako, berriz, Zerkausian elkartu dira. 111 pertsona izan dira bertan, tartean, udaleko ordezkariak. Rufo Ruiz de Eguilaz izan dute bazkalostean txisteak kontatuz umore ukitua jarriz, eta omenduak ere izan dira. Hain justu, Anjel Izagirre, Juan Bautista Aranzabe Mate, Mari Karmen Cuarteto eta Venceslao Jimenez omendu dituzte, "jubilatu eta pentsiodunen alde lan handia egin dutelako". Lore sorta eta oroigarri bana jaso dituzte udaleko ordezkarien eskutik.
Festa giroak dantzaldiarekin jarraitu du, Iñigo Perurenaren akordeek lagunduta.